Dolzarb uchrashuv: Bir-biridan quvvat olib Quvaytda

Oʻzaro manfaatdorlik zamiriga qurilgan hamkorlikning umri uzoq boʻladi. Oʻzbekiston va Quvayt oʻrtasidagi diplomatik munosabatlar 1992 yilda oʻrnatilgan boʻlib, ikki davlat oʻrtasidagi hamkorlik turli sohalarda faol rivojlanib kelayotgani rost.

Ana shu hamkorlikning yana bir qutlugʻ qadami bugun Prezidentimizning  Quvayt davlat amiri  Shayx Mishʼal  as-Saboh taklifiga binoan qilgan tashrifi boʻldi.

Ikkala davlat yetakchilarining samimiy muloqoti hamkorlikning manfaatli boʻlishiga zamin hozirladi.

Suhbat jarayonida Oʻzbekiston bilan Quvayt oʻrtasidagi doʻstlik va koʻp qirrali sheriklik munosabatlarini yanada rivojlantirish va mustahkamlash masalalari koʻrib chiqildi.

Prezidentimiz Quvaytda muvaffaqiyatli amalga oshirilayotgan, maqsad va vazifalari Yangi Oʻzbekiston taraqqiyot strategiyasining uzoq muddatli ustuvor yoʻnalishlariga hamohang boʻlgan “Nigoh 2035” davlat dasturini alohida qayd etdi.

Oʻzaro hamkorlik bir necha yillardan beri davom etib kelayotgani ahamiyatlidir. Keling, yaxshisi yaqin o‘tmishga bir nazar tashlaylik.

Ayniqsa,  iqtisodiy va investitsiyaviy jabhadagi hamkorlik eʼtiborga molik. Quvayt investitsiya jamgʻarmalari va kompaniyalari Oʻzbekistondagi turli sohalarga sarmoya kiritishga qiziqish bildirmoqda. Quvayt fondlari, ayniqsa, infratuzilma, energetika va qurilish sohalarida qator loyihalarni amalga oshirmoqda.

Xuddi shuningdek, savdo va iqtisodiy aloqalar ham ikki davlat oʻrtasida savdo-iqtisodiy hamkorlikni kengaytirish maqsadida qator qoʻshma loyihalar va tadbirlar tashkil etilmoqda. Savdo aylanmasini oshirish va Quvayt bozoriga oʻzbek mahsulotlarini eksport qilish muhim vazifalardan biri hisoblanadi. Oʻzbekiston Quvayt-Arab iqtisodiy taraqqiyot jamgʻarmasi bilan samarali hamkorlik qilib kelmoqda. Ushbu jamgʻarma Oʻzbekistonda infratuzilmaviy loyihalarni moliyalashtirishga hissa qoʻshmoqda. Taʼlim va ilmiy almashinuvlar ham koʻngildagidek boʻlayotgani sir emas. Oʻzbekiston va Quvayt universitetlari oʻrtasida hamkorlik aloqalari yoʻlga qoʻyilgan boʻlib, talabalar va tadqiqotchilar uchun oʻzaro almashinuv dasturlari tashkil etilmoqda.

 Xuddi shunday fikrlarni madaniy jabhada ham kuzatish mumkin. Ikki davlat oʻrtasida madaniy tadbirlar, festivallar va koʻrgazmalar oʻtkazilib, xalqlar oʻrtasidagi doʻstlik va hamkorlik mustahkamlanmoqda.

Yana shunisi diqqatga sazovorlik,  Quvayt kompaniyalari Oʻzbekistonda energetika sohasida, jumladan, qayta tiklanuvchi energiya manbalariga sarmoya kiritish masalalarini oʻrganmoqda. Quvayt moliyaviy institutlari Oʻzbekistonda yirik infratuzilma va yoʻl-qurilish loyihalarini moliyalashtirishda ishtirok etmoqda.

       Diplomatik va siyosiy munosabatlardagi xususan, ikki davlat tashqi ishlar vazirliklari oʻrtasidagi faol muloqot yoʻlga qoʻyilganligi quvonarlidir.  2024 yil 21 noyabrda Oʻzbekiston tashqi ishlar vaziri Baxtiyor Saidov Quvayt moliya vaziri va iqtisodiy masalalar hamda investitsiyalar boʻyicha davlat vaziri Nura Sulaymon Al-Fassam bilan uchrashib, iqtisodiy hamkorlik masalalarini muhokama qilingani ham yodimizda.

Bu galgi uchrashuvda “Yashil” energetika, sanoat kooperatsiyasi, qishloq xoʻjaligi, transport va logistika, infratuzilma, shaharsozlik, sogʻliqni saqlash, turizm sohalari amaliy hamkorlikning ustuvor yoʻnalishlari sifatida belgilandi.

Prezidentimiz qoʻshma loyihalarni ilgari surish maqsadida Investitsiya platformasi va Ishbilarmonlar kengashi kabi mexanizmlarni yoʻlga qoʻyishni ilgari surdi. Natijada, Al-Quvayt shahrida savdo uyini ochish boʻyicha kelishuvga erishildi.

Yangi sheriklik dasturi doirasida Quvayt arab iqtisodiy taraqqiyot fondi bilan loyihalar portfelini kengaytirishga alohida eʼtibor qaratildi. Bundan tashqari, Oʻzbekiston va Kuvaytda madaniyat va turizm haftaliklarini oʻtkazish, ikki mamlakat vakillarining sanʼat, musiqa, kino, taʼlim va sport sohalaridagi madaniy-gumanitar tadbirlarda faol ishtirok etishiga koʻmaklashishga kelishib olindi. Uchrashuvda Birlashgan Millatlar Tashkiloti, Islom hamkorlik tashkiloti, Shanxay hamkorlik tashkiloti, Qoʻshilmaslik harakati va boshqa nufuzli tuzilmalar doirasida oʻzaro qoʻllab-quvvatlashni davom ettirish muhimligi qayd etildi.

Uchrashuvning yana bir ahamiyatli jihati shundaki, joriy yil may oyida Samarqand shahrida oʻtkaziladigan “Markaziy Osiyo - Koʻrfaz arab davlatlari hamkorlik kengashi” muloqoti sammitiga tayyorgarlik koʻrish va uni oʻtkazish boʻyicha qoʻshma chora-tadbirlar muhokama qilindi.

Muzokaralar yakunida Oʻzbekiston Prezidenti Quvayt Amirini mamlakatimizga tashrif bilan kelishga taklif etdi.

Oʻzbekiston va Quvayt oʻrtasidagi hamkorlik siyosiy, iqtisodiy, investitsiyaviy va madaniy sohalarda yanada faol rivojlanishi, ikki davlat oʻrtasidagi aloqalar yanada mustahkamlanishi va buning amaliy natijalarini yaqin orada  koʻrishimiz aniq. 

Rahimboy JUMANIYOZOV,   

“TIQXMMI” MTU professori,

Oʼzbekiston Yozuvchilar va Jurnalistlar uyushmalarining aʼzosi